Eliades Ochoa bihar iritsiko da Baluartera '¡Como Nunca! World Tour' birarekin

Kubako sonero ezagunenetako bat eta bere belaunaldiko gitarra-jotzailerik onena den Eliades Ochoa Baluartera iritsiko da bihar, hilak 31n, arratsaldeko 20:00etan. Santiago de Cubako musikariak zuzeneko kontzertua eskainiko du Areto Nagusian, Europa, Estatu Batuak eta Mexikoko hainbat hiritan egingo duen ¡Como nunca! mundu mailako biraren baitan.

Sarrerak 40, 45 eta 50 eurotan Baluarteko txarteldegian eta NICDOk La Morea merkataritza-gunean duen informazio eta salmenta-putuan salgai daude. Halaber, online ere eskuragarri daude, www.baluarte.com webgunearen bidez, 40,95 / 45,95 eta 50,95 eurotan (kudeaketa-gastuak barne). Gainera, Sarrera Irisgarriak (MUPak eta PDSak) erosteko aukera dago.

Bost hamarkadatik gorako ibilbidea izan du Eliades Ochoak, eta sonaren, guajiraren, guaratxaren eta boleroaren enbaxadore handienetako bat izan da. Kuba bere jaioterritik nazioarteko agertoki nagusietara eraman ditu genero horiek. Buena Vista Social Club-en parte hartu izanak ospe globalera eraman zuen, bere proiekzio artistikoan mugarri bat ezarriz. 1999 eta 2000 artean, Grammy sarietarako izendatu zuten Latinezko Interpretazio Tropikal Onenaren kategorian eta Oscar sarietarako Buena Vista Social Club dokumentalean.