Flamenco on Fire Jaialdiak Manuel Liñán ekarriko du bihar Baluartera 'Muerta de Amor' ikuskizunarekin

Baluarten izango den Flamenco on Fire jaialdiko Grandes Conciertos zikloaren programazioak bihar, abuztuaren 28an, bere bigarren proposamena eskainiko du (21:15ean): Manuel Liñánen Muerta de Amor ikuskizuna, flamenko garaikidearen sorkuntza pertsonal eta txalotuenetako bat. Hamabi artistak hartuko dute parte eszenatokian, eta obrak bidaia emozional batera gonbidatuko du publikoa: desira, oroimena eta maitatzeko beharra dira dramaturgia zaindu baten ardatzak. Dantzaren, kantearen eta gitarraren bidez, Liñánek hainbat giro zeharkatzen dituen unibertso eszenikoa eraikitzen du, desiratik probokaziora, gorputza adierazpenerako, gatazkarako eta askatasunerako espazio gisa aztertuz.

Ikuskizunerako sarrerek 30 €, 35 €, 42 € eta 48 € balio dute, eta Baluarteko leihatilan nahiz NICDOk La Morea merkataritza-zentroan duen informazio- eta salmenta-gunean eros daitezke. Halaber, online ere eros daitezke, www.baluarte.com webgunearen bidez, 30,95 €, 35,95 €, 42,95 € eta 48,95 €-ren truke (kudeaketa-gastuak barne). Gainera, Sarrera Irisgarriak (MUPak eta PDSak) erosteko aukera dago.

Dantza Sari Nazionala den Manuel Liñánek Muerta de Amor lanarekin bere belaunaldiko sortzailerik eraginkorrenetako bat dela berresten du. Ikuslea hunkitzeko sortutako proposamena da, emozioen sakoneraraino iristen den esperientzia bat eskaintzen duena, ikuskizun hutsetik harago doana.