Punto de Vistak nazioarteko proiekzioa indartu du, 90 film inguru proiektatuz hogeigarren urteurrenean

Dagoeneko aurkeztu da ofizialki Punto de Vista 2026 Nafarroako Zinema Dokumentalaren Nazioarteko Jaialdiaren edizio osoa, Nafarroako Gobernuak sustatua eta NICDO sozietate publikoak antolatua. Hitzordua Iruñera itzuliko da apirilaren 20tik 25era, hogeigarren urteurrena ospatuz eta zinema dokumental garaikidearen ezinbesteko topaketa gisa duen posizioa sendotuz, bai Estatu mailan, bai nazioartean.

Sei egunez, Baluarten egoitza nagusia izango duen Punto de Vistak 90 film inguru eta 66 saio eta jarduera eskainiko ditu, proiekzioak, topaketak, hausnarketarako guneak eta publikoarentzat zabalik dauden proposamenak uztartuz. Horrela, Nafarroa ez-fikziozko zinemaren inguruko sorkuntzarako, pentsamendurako eta elkartrukerako funtsezko gune bihurtzen du.

Punto de Vista publiko orokorrari, eremu profesionalari eta akademikoari zuzendutako proposamen gisa aurkezten da. Aurten, urrats bat harago egin da Iruñeko eta Nafarroako ahalik eta publiko gehienengana hurbiltzeko, bitartekaritza plan baten bidez, hainbat ekimenekin, hala nola hiri osoko saltokien erakusleihoak ikusarazteko ekintza bat, La Bobina bezalako podcastetan parte hartzea, zeharkako ibilbideak diseinatzea, gazteentzako programazioan zehar ibilbide bat duen pasaporte bat sortzea edo antzeko erakundeetara eta ikasle sareetara hurbiltzeko lan bat.

Jaialdiak saio guztietarako sarrerak salgai jarri ditu bere webgunearen eta Baluarteko txarteldegiaren bitartez. Gainera, aste osoan txartel leihatila osagarri bat jarriko da barrutiaren atondoan. Sarreren prezio orokorra 3 eurokoa da saioko, batzuenak izan ezik, doan sartu ahal izango baita horietara.

Punto de Vista 2026ko funtsezko zifrak:

— Jaialdian zehar 66 saio egingo dira, proiekzioen eta jarduera paraleloen artean.

— 6 atal nagusik osatzen dute programazioa —Sail ofiziala, Fokuak, Lan, Ricercata, X Films eta Txinparta—, eta 90 film inguruk osatzen dute.

— 6 dira dagoeneko Punto de Vistaren ibilbidea markatzen duten zuzendaritza artistikoak, eta aurten hasiko da Miquel Martí Freixasen etapa, Manuel Asíni (2022-2025), Garbiñe Ortegari (2018-2021), Oskar Alegriari (2014-2017), Josetxo Cerdani (2010-2013) eta Carlos Muguirori (2005-2009) lekukoa hartuta.

— Sail ofiziala 19 filmek osatuko dute —zazpi film luze, metraje ertain bat eta hamaika film labur—, Amerika, Asia, Europa eta Afrikakoak. Lau mundu estreinaldi, nazioarteko estreinaldi bat eta hamalau estreinaldi nazional lehiatuko dira sari nagusiak lortzeko.

— Jaialdiak zeharkako 6 ibilbide proposatzen ditu aurten ere, programazioa ardatz tematiko desberdinetatik aztertzeko aukera ematen dutenak: Lurra, Gure gorputzak, Bizi garen planeta, Mugak saihestu (ezin), Bizi trazuak eta Hurbildu Punto de Vista, ikasleentzako ibilbide espezifiko batez gain.

— 110 gonbidatu inguruk bisitatuko dute Iruñea programazioan parte hartzeko.

— 150 pertsonak baino gehiagok eman dute izena gazteentzako ekimenetan, eta horietatik 14 parte hartzaile aukeratu dira Gazteriaren Epaimahairako eta 6 Gazte Programatzaileetarako.

— 9 egoitzak hartuko dute jaialdia: Baluartek, Golem zinemek, Nafarroako Unibertsitatearen Museoak, NUPek, Nafarroako Filmategiak, Oteiza Museoak, Civivox Condestablek, Civivox Pompelok eta Civivox Mendillorrik. Horiei Txintxarri, Tarantula eta Laba gehitu behar zaizkie musika programaziorako.

— Musika Punto de Vistara itzuliko da programazio espezifiko batekin. Programazio horrek 8 jarduera bilduko ditu, kontzertuen, DJ saioen eta Radio 3ko programen artean, zuzeneko emanaldiekin. Anavi, Celia Carrera, Adrian Alegria, Love’n’Joy, Masquepop, Bernal, Comic Sans, Hondora eta Annie Wonder, besteak beste.