Lizarrako Antzinako Musikaren 56. Asterako sarrerak Baluarte eta Moreako leihatiletan salgai daude jada

Lizarrako Antzinako Musikaren 56. astea (SMADE) irailaren 6tik 13ra bitartean egingo da, eta hiria musikarako, dantzarako eta poesiarako topagune bihurtuko duela agintzen du. Ibilaldiak lelopean, aurtengo edizioak hemezortzi ikuskizun eskainiko ditu, musika-ondare aberatsa eta sormen-ikuspegi berriak uztartzea helburu dutenak.

Sarrerak aurrez aurre Baluarteko leihatilan eta NICDOk La Morean duen salmenta-puntuan jada eskura daitezke, bai eta kontzertuen egoitzetan ere, kontzertuak hasi baino ordubete lehenagotik. Gainera, Baluarte Fundazioaren eta SMADEren webguneetan ere eskuragarri egongo dira txartelak. Lizarrako kontzertuetarako abonuek (San Migel elizan eta Santa Klara komentuan) 90 euroko prezioa izango dute (45 euro gazte txartelarekin). Lizarrako San Migel eta Santa Klarako emanaldietarako eta Abartzuza eta Lorcako elizetarako banakako sarrera 14 eurokoa izango da (7€ gazte txartelarekin).

Irailaren 6an inauguratuko da SMADEren 56. edizioa, SMADE a pie de calle programaren esku-hartzeekin. Asteburu horretan antzinako musika Lizarrako eta inguruko Lorca herriko hainbat tokitara eramango da. Ensemble La Danserye (irailak 6 eta 7) eta Iruñeko Katedraleko kanpai-joleak izango dira hiri-jarduera horien protagonistak. Kontzertu nagusiak San Migel elizan (irailaren 6, 8, 10 eta 12an), Santa Klara komentuan (irailaren 7, 9, 11 eta 13an), Lorcako elizan (irailaren 7an) eta Abartzuzako elizan (irailaren 13an) izango dira. Programazioak artista eta talde ezagunen emanaldiak biltzen ditu, besteak beste: Al Ayre Español (irailaren 6an, San Migel elizan), Isabel Villanueva (irailaren 7an, Lorcako elizan), Ensemble Phoenix Munich (irailaren 7an, Santa Klara komentuan), Estella Canta eta Les Troveurs (irailaren 8an, Santa Klara komentuan), Euskal Barrokensemble (irailaren 9an, Santa Klara komentuan), Sara Águeda eta Pepe Viyuela (irailaren 10ean, Santa Klara komentuan), Revocal Ensemble Kosovo (irailaren 12an, Santa Klara komentuan), Sara Águeda eta Melania Olcina (irailaren 13an, Santa Clara komentuan).