SECPHO Summit 2026

SECPHO Summit SECPHOk bultzatutako deep tech ekosistemaren urteko erreferentziazko topaketa da. SECPHO teknologiaren berrikuntzako Espainiako klusterrak antolatzen du, eta 17. edizioan Baluartera iritsiko da, enpresak, startup-ak, zentro teknologikoak, ikertzaileak, inbertitzaileak eta erakunde publikoak elkartzeko, teknologia-transferentzia bizkortzeko eta lankidetzarako aukera berriak sustatzeko helburuarekin.

Deep tech teknologiak zientzian eta ingeniaritza aurreratuan oinarritutako berrikuntzak dira, hala nola adimen artifiziala, fotonika, mikroelektronika, robotika, konputazio kuantikoa edo material berriak. Teknologia horiek industria- eta gizarte-erronka handiei erantzuteko gaitasuna dute.

Programak dinamika interaktiboak, mahai-inguruak, erronka teknologikoak eta networking-saioak uztartzen ditu. Horrez gain, erakusketa-gune bat izango du, hainbat teknologia eta erakustaldirekin; finantzaketa bilatzen ari diren proiektuentzako Investor's Corner gunea; eta merkatura transferitzeko potentziala duten ikerketa-proiektuen galeria.

Gainera, ekitaldiak ekosistemaren gaitasun nabarmenenetako batzuk ezagutzeko aukera emango du, hala nola osasuna, elikadura, industria aurreratua, energia eta teknologia dualak bezalako arlo estrategikoetan.