Baluarte Fundazioaren Baluarte Txiki zikloak 2022/2023 programazioaren azken txanpari ekingo dio. Zehazki, larunbatean, hilak 25ean, denboraldiko azken aurreko proposamena ekarriko du Baluartera: Memory, hari laukote, zirku artista eta narratzailearentzako kontzertu eszenikoa. Arte eszenikoak haurrei eta familiei hurbiltzeko asmoz, Memory-k zirkua eta musika klasikoa uztartuko ditu Ganbera Aretoan arratsaldeko 17:00etan.

 

Zirkuko artista den El Gran Rufusek malabareak eta orekak egingo ditu jostailuekin eta beste objektu batzuekin, hala nola kometa batekin, kapelekin, diaboloarekin, bizikleta batekin edo kulunka batekin. Aldi berean, Memory ikuskizunak Edward Elgarrek umetan konposatutako La varita de la juventud obraren zuzeneko musika ekarriko du Baluartera, hari laukote baten eskutik: Garazi Echeandia Arrondo biolin katedraduna, María Fernández Molina biola irakaslea eta Sofía Zumel González biolontxelo eta Aitor Prada Sanz de Galdeano biolin ikasleak. Gainera, ikuskizunaren gidoia idatzi duen Ana Hernández-Sanchiz izango du narratzaile. Emanaldiak irudimena piztu eta haurrak antzezle eta sortzaile gisa inspiratu nahi ditu. Oroitzapenei eta oroimen-galerari buruz hausnartzen laguntzen du, eta, aldi berean, zuzeneko musika eta irrati-narrazioa entzutea sustatzen du.

 

Ikuskizunak 50 minutuko iraupena du eta 4 urtetik aurrera gomendatzen da. Sarrerak 8 eurotan ohiko kanaletan eskuratu ahal izango dira: Baluarteko txarteldegian, www.baluarte.com web-orrian eta NICDOk La Morean jarri duen salmenta-gune berrian. Gainera, 4 sarrera-sortak ere salduko dira, 25 eurotan, soilik txartel-leihatilan.

 

Baluarte Txiki zikloko seigarren eta azken hitzordua Atena Konpainia Artistikoaren Meraki Momentuak dantza garaikide emanaldia izango da, maiatzaren 6an.